ТАФТИШОТ АЗ РУИ 487 ПАРВАНДАИ ҶИНОЯТӢ БА ИТМОМ РАСОНИДА ШУД

                 Қӯрғонтеппа, 15 октябр. (АМИТ «Ховар», Мурод Сотиев). Муфаттишони мақомоти прокуратураи вилояти Хатлон тафтишоти 487 парвандаи ҷиноятиро ба итмом расонида онҳоро ба суд фиристонидаанд , ки назар ба ҳамин давраи соли гузашта 16 парванда зиёдтар аст. Тавре ёрдамчии калони прокурори вилояти Хатлон Варқа Зайниддинов иттилоъ дод, дар давраи ҷамъбасти прокуророни шаҳру ноҳияҳои А.Ҷоми, Қумсангир, Ёвон, Восеъ, Қубодиён, Кӯлоб дар нӯҳ моҳи соли ҷорӣ нисбат ба соли гузашта зиёдтар парвандаи ҷиноятӣ ба суд ирсол кардаанд.                   Ба иттилои В. Зайниддинов, аз тарафи прокуророни шаҳру ноҳияҳо 32 адад парвандаҳои ҷиноятӣ дар истеҳсолот қатъ карда шудааст, ки нисбат ба соли гузашта 8 парвандаи ҷиноятӣ камтар мебошад. Аз тарафи судҳо бошад ба тафтишоти иловагӣ 7 парвандаи ҷиноятӣ баргардонида шудааст.