ТИЛЛОҲОИ БОНКИ МИЛЛИРО КӢ ТАФТИШ МЕКУНАД ?

                Душанбе, 16 октябр.(АМИТ «Ховар», Покиза Маҳмадбекова). – «Ширкати байналмилалии аудитии Эрнст энд Янг (Ernst & Young) тафтиши захираҳои тиллоии Бонки миллии Ҷумҳурии Тоҷикистонро дар рӯзҳои наздик ба анҷом мерасонад» — чунин изҳор кард раиси Бонки миллии Ҷумҳурии Тоҷикистон Шариф Раҳимзода дар нишасти матбуотӣ.                Ҳаҷми умумии захираҳои тиллои Бонки миллӣ 331,8 миллион доллари ИМА – ро ташкил медиҳад. Дар захираҳои бонки миллӣ ба миқдори 4 тонна тилло ҳифз карда мешавад. Мувофиқи суханони раиси Бонки миллӣ айни ҳол дар ҷаҳон нархи тилло тамоюли боло рафтан дорад. Ҳоло як унтсия (31,1 грамм) тилло ба 1070 доллари ИМА баробар мебошад.                Дар нишасти матбуотӣ қайд карда шуд, ки Хазинаи байналмилалии асъор дар муддати се сол ба ҳаҷми 116 миллион доллари амрикоӣ ба Ҷумҳурии Тоҷикистон қарз медиҳад, ки аз ин ҳисоб, аллакай 40 миллион доллар ба мамлакат ворид шудааст.