ВОХӮРӢ БО МУОВИНИ РАИСИ ВИЛОЯТ

                 Кӯлоб, 6 октябр. (АМИТ «Ховар», Сулаймон Холов).- Бори нахуст дар тӯли чанд соли охир ба мушкилоти соҳаи журналистикаи минтақаи Кӯлоби вилояти Хатлон зимни як вохӯрӣ, ки бо ташаббуси бевоситаи муовини раиси вилоят Ҳикоятмоҳ Ҳакимова созмон дода шуда, дар он кулли намояндагии расонаҳои хабарии минтақа ширкат варзиданд, таваҷҷӯҳи хоса зоҳир гардид. Дар ин ҳамоиш бахусус ба мушкилоти соҳа дар маҳалҳо ибрози назар карда шуд. Зимни нишаст аз ҷумла қайд гардид, ки дар аксари мавридҳо роҳбарони корхонаю ташкилот ва раисони ноҳияҳо ба хабарнигорон оид ба ин ё он мавзӯъ иттилоъ намедиҳанд. Инчунин қабул накардани хабарнигорон аз ҷониби мансабдорон кормандони васоити ахбори умумро ба ташвиш овардааст, ҳамчунин аз тарафи роҳбарон чандин ҳолатҳои нагузаронидани нишастҳои матбуоти мувофиқи нақшаи тартибдодаи ҳукумати вилоят, ҷавоб нагардонидан ба мақолаю гузоришҳои таҳлилию танқидӣ аз ҷониби шахсони масъул изҳори нигаронӣ намуда, мушкилоти дигари соҳаро дар набудани чопхонаи замонавӣ дар минтақаи Кӯлоб арзёбӣ карданд. Дар вохӯри қайд карда шуд, ки айни замон ташвишовар он аст, ки рӯзномаҳои ноҳиявӣ ба моҳвора ва ҷашнвора табдил ёфта, аз ҷониби ҳокимиятҳои давлатии ноҳияҳо дастгирӣ намеёбанд. Муовини раиси вилояти Хатлон дар анҷоми вохӯрӣ пешниҳодҳои хабарнигоронро дурусту саривақтӣ номида, онҳоро бовар кунонид, ки пешниҳодҳои онҳо оҷилан ба ҳукумати вилояти Хатлон расонда хоҳанд шуд.