АБДУЛЛО АЗ ИШТИРОК ДАР ИНТИХОБОТ ДАСТ КАШИД

                Кобул, 2 ноябр. (АМИТ «Ховар» — afganistan.ru). – Интихоботи такрории президенти Афғонистон 7 – уми ноябр баргузор хоҳад шуд, — изҳор кард дар сӯҳбат бо шабакаи телевизионии «Тулӯъ» раиси комиссияи мустақили интихобот Нур Муҳаммад Нур.                   Ёдовар мешавем, ки яке аз номзадҳои асосӣ ба мақоми Президенти Афғонистон Абдулло Абдулло дирӯз изҳорот пахш кард, ки дар даври дуюми интихоботи президентӣ иштирок намекунад. Дар баробари ин Абдулло Абдулло аз ҷонибдорони худ барои эътироф накардани интихобот даъват ба амал наовард.                 Қаблан доктор Абдулло Абдулло ба ҳукумати Афғонистон ва намояндагии СММ барои баргузории такрории интихоботи президентӣ талабот пеш гузошта буд. Пас аз розӣ шудани Ҳомид Карзай ба интихоботи такрорӣ Абдулло Абдулло талаб пеш гузошт, ки раиси Комиссияи мустақили интихобот ва се вазири ҳукумат дар давраи дуюми интихобот муваққатан аз вазифа барканор карда шаванд. Аммо, Ҳомид Карзай талаби навбатии Абдулло Абдуллоро иҷро накард. Абдулло изҳор кард, ки «Вақте ки шартҳои пешгузоштаи мо, ки барои шаффоф гузаштани интихобот равона шуда буд, иҷро нагардиданд, пас кафолати шаффоф гузаштани интихоботи даври дуюм вуҷуд надорад. Бинобар ҳамин ман аз иштирок дар даври дуюм даст мекашам».                 Мувофиқи суханони мутасаддии масъули комиссияи мустақили интихобот Довуд Алӣ Наҷафӣ Сарқонуни мамлакат гузаронидани интихоботро дар ин маврид иҷозат медиҳад.                   Ба ақидаи баъзе коршиносон, иштирок накардани Абдулло Абдулло дар даври дуюми интихоботи президентӣ метавонад сабабгори шиддат гирифтани вазъият дар мамлакат гардад.