БОРИШҲОИ ШАДИД ДАР МАККА

                Қоҳира, 27 ноябр. (АМИТ «Ховар» — ИТАР – ТАСС). — Тибҳои хабарҳои расида, шабонарӯзи гузашта дар Арабистони Саудӣ борони шадид борид, Дар натиҷаи он сел ва обхезӣ ба амал омад. Дар натиҷаи боришҳо, омадани сел ва обхезӣ 48 нафар, аз ҷумла, зоирин ҳалок шуданд. Ширкати телевизионии «Алҷазира» хабар дод, ки дар шаҳри Макка ва музофотҳои он бориши борон давом дорад.                 Бояд гуфт, ки дар маросими ҳаҷи имсола 2,5 миллион нафар иштирок менамояд. Зоирон дирӯз, 26 ноябр дар доманаи кӯҳи Арафот маросими «вуқуф» — ро иҷро намуданд.                  Мақомоти дахлдори Арабистони Саудӣ барои таъмини бехатарии зоирон аз фалокатҳои ғайричашмдошт, аз ҷумла, сӯхтор, фишори анбӯҳи одамон ва ғайра тадбирҳои зарурӣ андешиданд. Вале онҳо барои пешгирии оқибати бориши тӯлонии борон тайёр набуданд. Ин сабаби ҳалокати одамон гардид.