ДАР НБО НОРАК САДАМА РӮЙ НАДОДААСТ!

                  Душанбе, 9 ноябр. (АМИТ «Ховар», Кристина Эрлих). — Роҳбари хадамоти матбуотии ширкати холдингии «Барқи тоҷик» Нозир Ёдгорӣ изҳор кард, ки «Дар нерӯгоҳи барқи обии Норак ягон садама рӯй надодааст, шабакаҳои барқи Тоҷикистон пурра барқарор ва кор мекунанд».                  «Баъзе сайтҳои интернетӣ, аз ҷумла сайтҳои «Сентр-Азия», «CA-NEWS», инчунин дигар васоити ахбори омма хабар паҳн карданд, ки гӯё бо сабаби рӯй додани садама дар НБО Норак интиқоли барқ ба як қатор шаҳру ноҳияҳои ҷумҳурӣ қатъ гардида бошад. Хадамоти матбуотии ширкати «Барқи тоҷик» ин маълумотро қатъиян рад мекунад!», — изҳор кард Н.Ёдгорӣ.                   Ба қавли Н.Ёдгорӣ бинобар фаро расидани хунукӣ дар ҷумҳурӣ, истифодаи қувваи барқ афзуд, ки ин дар навбати худ барои аз меъёр зиёд кор кардани шабакаҳои барқӣ, аз ҷумла хатти баландшиддати «Норак – Регар» оварда расонид. Дар натиҷа, сохтори дохилии шабакаҳои барқӣ ба таври автоматӣ аз кор монданд. Бояд гуфт, ки ин ҳолат барои роҳ надодан ба садамаҳои бузург дар истгоҳҳои барқӣ пешбинӣ карда шудааст. Ҳоло ҷумҳурӣ пурра бо нерӯи барқ таъмин аст, аммо интиқоли он мувофиқи реҷа ба роҳ монда шудааст.                  Ёдовар мешавем, ки айни ҳол шабакаҳои барқи Тоҷикистон дар бунбасти энергетикӣ , яъне берун аз Шабакаҳои барқи Осиёи Марказӣ фаъолият дорад.Бинобар ҳамин бо мақсади таъмини мӯтаъдили нерӯи барқ дар фасли зимистон, ба мавзеъҳои деҳот дар ҷойҳое, ки иншооти муҳиму ҳаётӣ воқеъ нест, барқ ба таври реҷавӣ дода хоҳад шуд.                   «Барқчиёни тоҷик ният ва имкон доранд, ки бо истифода аз захира ва қувваи дохилӣ ҷумҳуриро аз ин ҳолат берун кунанд», — қайд кард Н.Ёдгорӣ.                    Камбуди барқ бо ба истифода додани НБО Сангтӯда-1 ва 38 нерӯгоҳи барқи обии хурд, инчунин саривақт захира кардани об дар обанборҳои ҷумҳурӣ ҳамагӣ 1,8 – 2 милр.д киловатт соатро ташкил мекунад, ҳол он ки ин рақам соли гузашта ба 4-6 милр.д киловатт соат мерасид.                   Соли ҷорӣ ба пойтахт ва марказҳои маъмурии вилоятҳои ҷумҳурӣ нерӯи барқ бе маҳдудият интиқол дода мешавад, — гуфт дар охир сарчашма.