ПЕШГИРИИ ҚОЧОҚИ ПАХТА

                   Душанбе, 25 ноябр. (АМИТ «Ховар», Наргис Бойаҳмадова). — Ҳангоми гузаронидани амалиёти гумрукӣ дар ҳудуди ҷамоати Қистақӯзи ноҳияи Бобоҷон Ғафуров, дар лаҳзаи убури сарҳади гумрукӣ ба Ҷумҳурии Қирғизистон воситаи нақлиёти тамғаи «Камаз», рақами давлатиаш ЕВ 09-93 02рт, таҳти ронандагии Мингбошиев Насруддин бо роҳбаладии истиқоматкунандаи ҷамоати Қистақӯз Сироҷиддинов Муқим, ҷиҳати гузаронидани муоинаи гумрукӣ боздошта шуд.                    Дар рафти тафтиш маълум гардид , ки дар бордони нақлиёти мазкур пахтаи чигитдор мавҷуд буда, шаҳрвандон Сироҷиддинов М. ва соҳиби пахта Нозимҷон Назарзода оиди фӯруши пахта маслиҳат намуда, ҳангоми интиқоли моли мазкур ба қишлоқи «60-сола» -и Ҷумҳурии Қирғизистон, бо роҳи ғайрирасмӣ, бе варақаи гумрукӣ дастгир гардиданд.                    Нозири калони шӯъбаи иттилоотии Хадамоти гумруки назди Ҳукумати ҶТ Нурулло Шарипов ба мухбири АМИТ «Ховар» иттилоъ дод, ки нисбати Сироҷиддинов Муқим парвандаи ҳуқуқвайронкунии маъмурӣ оғоз карда шуда, тафтишот давом дорад.