АЗ ӮЗБЕКИСТОН ҲАМ САҲМИЯҲОИ РОҒУНРО ХАРИДАНД

                  Душанбе, 6 январ. (АМИТ «Ховар», Дилшодаи Ҷонмард).- Кормандони Сафорати Ҷумҳурии Тоҷикистон дар Ҷумҳурии Ӯзбекистон чиҳати дастгирии иқдоми неки Президенти Ҷумҳурии Тоҷикистон Эмомалӣ Раҳмон барои комёб шудан ба мустақилияти энергетикии Тоҷикистон аз ҳисоби маоши худ дар ҳаҷми 5 фоизи маоши солона (2896 доллари ИМА) ва сафир дар ҳаҷми 10 фоизи маоши солона (1620 доллари ИМА) барои харидории саҳмияҳои Ҷамъияти саҳҳомии шакли кушодаи «НБО Роғун» маблағ ҷудо намуда, ба суратҳисоби ҷамъияти мазкур гузарониданд. Дар ин бора ба АМИТ «Ховар» аз  Сафорати Ҷумҳурии Тоҷикистон дар Ҷумҳурии Ӯзбекистон иттилоъ доданд.                     Лозим ба зикр аст, ки кормандони сафорат тасмим гирифтаанд, ки дар давоми семоҳаи якуми соли 2010-ум 5 фоизи маоши солонаи худро барои хариди саҳмияҳои НБО-и Роғун мегузаронанд. Инчунин, аз ҳисоби маблағҳои сарфношудаи сафорат ба суратҳисоби Роғун 19000 доллари ИМА гузаронида шуд.                      Умуман, аз ҳисоби маоши кормандон ва маблағҳои сарфношудаи сафорат ба суратҳисоби НБО-и Роғун 23 516 доллари ИМА (102 539 сомонӣ) интиқол гардид.                      Ҷиҳати таблиғи иқдомоти мазкур сафорат тавассути ВАО – и кишвари иқомат низ фаъолият анҷом дода истодааст, ки саҳифаи махсуси ҳафтаномаи «Туркистон — пресс» таҳти рубрикаи «Набзи Тоҷикистон» ба оғози фурӯши саҳмияҳои ҷамъияти номбурда бахшида шудааст. Кор дар самти мазкур идома меёбад ва сафорат ҷиҳати ҷалб намудани маблағҳои иловагӣ тавассути сайт, пресс – релиз байни сафорату созмонҳои байналмиллалии муқими Тошканд, ҷамъияту диаспораҳои тоҷик ва соҳибкорону корчаллонони кишвари иқомат, пайваста фаъолият мебарад.