ДДТТ МУАССИСАҲОИ ТАНДУРУСТИРО БО КАДРҲОИ БАЛАНДИХТИСОС ТАЪМИН МЕКУНАД

                   Душанбе, 25 январ. (АМИТ «Ховар», Ибодат Давлатова).- Яке аз ҳадафҳои асосии фаъолияти донишгоҳ ин таъмин намудани эҳтиёҷоти муассисаҳои тандурустии мамлакат бо кадрҳои баландихтисоси тиббӣ мебошад, қайд гардид дар нишасти матбуотии Донишгоҳи давлатии тиббии Тоҷикистон ба номи Абӯалӣ ибни Сино.                        Инчунин, қайд намуданд, ки дар ин самт проблемаи то ба ҷои кор рафта расидани хатмкардагони донишгоҳ яке аз масъалаҳои ҳалталаб мебошад. Раёсати донишгоҳ дар ин ҷода бо Вазорати тандурустӣ ҳамкори менамояд. Таҳлилҳои муқоисавӣ нишон медиҳанд, ки нишондоди то ба ҷои кор рафта расидани хатмкардагони донишгоҳ аз 21,2% (соли 2001) то 62,1% (соли 2009) афзоиш ёфтааст.                       Яке аз сабабҳои беҳтар шудани нишондиҳандаи то ба ҷои кор ҳозир гаштани хатмкунандагон ин беҳтар гардидани шароити иҷтимоиву иқтисодӣ дар маҳалҳо бошад, сабаби дигараш соли охир ба хатмкунандагон роҳхат барои ҷои кор дода мешавад ва танҳо баъди аз сардухтури беморхонаҳои марказии ноҳиявӣ ё вилоятӣ тасдиқнома оид ба таъмин шудан бо ҷои кор ба ҷои равонкардашуда овардан ба мутахассиси ҷавон диплом дода мешавад.                        Ҳалли ин масъала аз бисёр ҷиҳат аз дахолати мақомоти иҷроияи ҳокимияти маҳаллӣ вобаста мебошад, зеро бо роҳҳои гуногун ҳавасмандгардонии мутахассисони ҷавон дар ин самт нақши муҳимеро мебозад.