ХОНАИ ХУДРО ОТАШ НАЗАНЕД

                 Душанбе, 16 январ. (АМИТ «Ховар», Жасмин Назарова). — Ҳафтаи сипаришуда дар миқёси ҷумҳурӣ 26 ҳодисаи сӯхтор бо хисороти молии умумии 55 ҳазору 960 сомонӣ ба қайд гирифта шуд.                   Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ Толиб Ҳаётов, масоҳати умумии сӯхторҳо 1138 метри мураббаъро ташкил медиҳад. Чун ҳарвақта сабабҳои асосии ҳодисаҳои нохуш – муносибати беэҳтиётона бо оташ, вайрон кардани қоидаҳои бехатарӣ аз сўхтор ҳангоми истифодаи асбобҳои гармидиҳандаи барқӣ ва газӣ, расиши кӯтоҳи ноқилҳои барқӣ мебошанд.                   Дар давоми ҳафта дар вилояти Суғд – 7, вилояти Хатлон – 6, ВМКБ – 1, шаҳри Душанбе – 6, ноҳияҳои Турсунзода ва Рӯдакӣ — 2, Ваҳдат ва Файзобод 1 ҳодисаи сӯхтор ба қайд гирифта шудааст.                      Аз ҷумла, дар ноҳияи Рудакӣ дар натиҷаи расиши кўтоҳи ноқилҳои барқӣ манзили истиқоматии соҳибкор Аҳтам Усмонов оташ гирифт. Шифт ва молу ашёҳои хона дар масоҳати 112 метри мураббаъ сӯхта хокистар шуданд. Ҳангоми ба ҷои ҳодиса расидани 2 адад автомашинаи оташнишонони қисми мустақили минтақавии зудамали СРХДО ноҳияи мазкур сӯхтор хомӯш карда шуда молу ашёи боқимондаи хона ба маблағи 60 ҳазор сомонӣ наҷот дод шуд.                    Бино ба таҳқиқи коршиносон гунаҳкори ҳодиса соҳибхона ба ҳисоб рафта, зарари аз сӯхтори ба амал омада маблағи 4 ҳазор сомониро дарбар мегирад.