ИМЗОИ ҚОНУНҲО АЗ ҶОНИБИ ПРЕЗИДЕНТ

                    Аз ҷониби Президенти Ҷумҳурии Тоҷикистон якчанд қонунҳо, ки аз тарафи Маҷлиси намояндагон қабул гардида, Маҷлиси миллии Маҷлиси Олии Ҷумҳурии Тоҷикистон онҳоро ҷонибдорӣ намудааст, ба имзо расид.                     Қонунҳои Ҷумҳурии Тоҷикистон «Дар бораи омори давлатӣ», «Дар бораи нафақаҳои суѓуртавӣ ва давлатӣ», «Дар бораи Ҷамъияти Ҳилоли Аҳмари Тоҷикистон», «Дар бораи истифодаи манбаъҳои барқароршавандаи энергия», «Дар бораи ворид намудани таѓйирот ба Қонуни Ҷумҳурии Тоҷикистон «Дар бораи ветеранҳо» аз ҷумлаи онҳо мебошанд.                        Қонуни Ҷумҳурии Тоҷикистон «Дар бораи омори давлатӣ» муносибатҳоро дар соҳаи омор танзим намуда, ҳуқуқу ўҳдадориҳои мақомоти давлатӣ ва воҳидҳои омориро муайян мекунад.                        Қонуни ҷумҳурии Тоҷикистон «Дар бораи нафақаҳои суѓуртавӣ ва давлатӣ» масъалаҳои таъину пардохти нафақаҳои суѓуртавӣ, манбаҳои маблаѓгузории онҳо, ҳуқуқу ўҳдадориҳои мақомоти давлатӣ ва шахсони воқеию ҳуқуқӣ ва паҳлўҳои дигари ин соҳаро танзим менамояд. Мувофиқи ин қонун низоми нави таъин ва пардохти нафақа аз 1 январи соли 2011 ҷорӣ карда мешавад.                       Қонуни Ҹумҳурии Тоҷикистон «Дар бораи истифодаи манбаъҳои барқароршавандаи энергия» қонуни нав ва мукаммал буда, асосҳои ташкилию ҳуқуқии истифодаи манбаъҳои барқароршавандаи энергияро ба мисли об, бод, офтоб муқаррар ва самтҳои дигари онҳоро танзим менамояд.                     Мувофиқи таѓйиру иловаҳои ба Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон» ва Кодекси мурофиавии граждании Ҷумҳурии Тоҷикистон воридгардида, дар Суди Олӣ, судҳои вилоятҳо ва шаҳри Душанбе таъсиси коллегияҳо оид ба корҳои оилавӣ ва маъмурӣ пешбинӣ шудааст. Таъсиси чунин коллегияҳо барои такмили фаъолият мақомоти судӣ ва ҳифзу ҳимояи ҳуқуқу озодиҳои инсон, шаҳрванд, баррасии саривақтӣ ва босифати пардвандаҳо дар ин самт равона карда шудааст.                     Қонунҳои ба имзорасида пеш аз ҳама ба таъмини ҳуқуқу озодиҳои инсон, ҳифзу ҳимояи манфиати давлату ҷамъият, шахсони ҳуқуқӣ, беҳдошти вазъи иқтисодию иҷтимоии кишвар, такмили қонунгузории ҷорӣ ва тақвияти фаъолияти мақомоти давлатӣ, танзиму таҳкими муносибатҳои ҷамъиятӣ ва тартиботи ҳуқуқӣ нигаронида шуда, барои пешрафти минбаъдаи ҳаёти ҷомеа мусоидати бештаре хоҳанд кард.