ИСТИФОДАБАРИИ ЗАМИН НАЗОРАТИ ҚАТЪИРО ТАЛАБ МЕКУНАД

                   Файзобод, 21 январ. (АМИТ «Ховар», Зебо Давлатова).- Тибқи маълумоти фаврии Кумитаи заминсозии ноҳияи Файзобод дар соли 2009 як қатор корҳо оиди муносибатҳои вобаста ба замин ва заминсозӣ, риояи қонунгузории замин ва ба танзим даровардани ҳуҷҷатҳои заминистифодабарӣ дар ноҳия ба анҷом расонида шудааст.                   Кумитаи заминсозии ноҳия дар соли равон бо мақсади иҷрои ҳатмии муроҷиатномаи Президенти мамлакат дар ҳудуди деҳоти заминҳои хоҷагиҳои кишоварзӣ, новобаста аз шакли моликияташон назорат оиди гузаронидани кишти зироатҳои хоҷагии қишлоқ, бунёди боғҳои нав, аз нав ташкилкунии боғҳои кӯҳна ва самараноку оқилона истифодабарии замин дар заминҳои хоҷагии ёрирасони шахсӣ ва заминҳои наздиҳавлигии шаҳрвандон бо иштироки намояндагони ҷамоатҳои деҳот ва кумитаҳои маҳаллаҳои деҳот гузаронида шуд.                   Дар натиҷа маълум гардид, ки 53 гектар боғи нав дар ноҳия аз тарафи заминистифодабарандагон бунёд карда шудааст. 87 гектар боғҳои кӯҳна аз тарафи хоҷагиҳои деҳконии ҳудуди ноҳия аз нав барқарор карда шуд. Дар хоҷагиҳои ҳудуди ноҳия ҳамагӣ дар масоҳати 1750 гектар кишти тирамоҳи гузаронида шудааст, ки аз он 1020 гектараш замини обӣ мебошад.                     «Кумитаи заминсозии ноҳияи Файзобод барои рафъи вайронкунии қонунгузории замин ва ба танзим даровардани муносибатҳои вобаста ба замин назоратро пурзӯр намуда тамоми чораҳои лозимиро меандешанд; — гуфт дар охири сӯҳбат ба хабарнигори АМИТ «Ховар» раиси кумитаи заминсозии ноҳияи Файзобод Илҳом Ҳасанов.