МАҶЛИСИ ШӮРОИ ДОИМИИ СААД
Маскав, 27 январ. (АМИТ «Ховар», Ҳалима Хушқадамова). — 26 январ дар Маскав маҷлиси навбатии Шӯрои доимии Созмони аҳдномаи амнияти дастаҷамъӣ баргузор гардид. Дар он масъалаи тайёр кардани кадрҳои низомӣ барои қувваҳои мусаллаҳи мамлакатҳои аъзои созмон мавриди баррасӣ қарор дода шуд. Иштирокчиёни маҷлис қарор қабул намуданд, ки Омӯзишгоҳи олии ҳарбии Краснодар ба номи генерал Штеменко маркази асосии таълимию методии омода сохтани кадрҳои низомӣ барои мамлакатҳои аъзои созмон муқаррар карда шавад. Ин имкон медиҳад, ки давлатҳои аъзои созмон бо мутахассисони варзидаи соҳаи ҳарбӣ, аз ҷумла амнияти иттилоотӣ таъмин карда шаванд. Омӯзишгоҳи мазкур инчунин ба мактабҳои олии соҳавии мамлакатҳои аъзои созмон кӯмаки методӣ мерасонад.