ОРДЕРҲОИ ХАРОҶОТИ ҚАЛБАКӢ ФОШ ШУДАНД

                Душанбе, 7 январ. (АМИТ «Ховар», Лаззат Диловарзод).- Бино ба маълумоти шӯъбаи пешгирии коррупсияи ҶТ, кормандони шӯъбаи минтақавии Агентӣ дар шаҳри Кӯлоб дар натиҷаи гузаронидани корҳои фаврӣ — ҷустуҷӯӣ муайян намуданд, ки сармуҳосиби ҷамоати деҳоти Кушкияи ноҳияи Темурмалик Эшонқул Шамаев дар давоми солҳои 2007 – 2009 бо номи кормандони ҷамоат ва мактабҳои атрофи он дар варақаҳои пулӣ ва ордерҳои хароҷотӣ ба маблағи 10 ҳазору 243 сомонӣ ҳамчун музди меҳнат, иловагӣ навиштааст. Ҳамчунин ғайриқонунӣ бо номи хазиначии ҷамоат, сарварони мактабҳо ва бо номи мудирони хоҷагиҳои мактабҳои ҷамоат ордерҳои хароҷотии қалбакӣ ва бо маблағи 52 ҳазору 95 сомонӣ маблағҳои таҳти ҳисоботӣ тартиб дода, онро аз они худ намудааст.                  Зарари ба давлат расонидаи Эшонқул Шамаев 62 ҳазору 498 сомониро ташкил додааст.                     Кормандони шӯъбаи минтақавии Агентӣ дар шаҳри Кӯлоб нисбати тороҷгари маблағҳои давлатӣ Э. Шамаев бо аломати моддаи 245 қ.3 (азонихудкунӣ ё исрофкорӣ) – и КҶҶТ тафтиш мебаранд.