БАРОИ СОХТМОНИ РОҲИ ОҲАН МАБЛАҒ ЗАРУР АСТ

Душанбе,  15  феврал. (АМИТ «Ховар», Кристина Эрлих). —  Аз  корхонаи  воҳиди давлатии  «Муассисаи  роҳи  оҳани  Тоҷикистон» ба  АМИТ «Ховар»  хабар  доданд, ки барои  сохтмони роҳи  оҳани  Ваҳдат —  Ёвон  маблағи  калон  зарур  аст. Дарозии  роҳи  мазкур  46  километр  буда,  барои  сохтмони он  бештар  аз  120  миллион  доллари  ИМА  талаб  карда  мешавад. Қайд  карда  мешавад, ки  танҳо  муассисаи  роҳи  оҳани  мамлакат  аз  ӯҳдаи  ҷудо  кардани  ин  қадар  маблағ  баромада  наметавонад.  Бинобар  ин  манбаи  сармоягузории  хориҷиро  пайдо  кардан  зарур  аст.  Айни  ҳол  сохтмони  5,2  километр  роҳи  оҳани  оянда ба  нақша  гирифта  шудааст.  Ба  нақшагирии  41  километри  боқимондаи  роҳ  идома  дорад. Роҳи  оҳани Ваҳдат  — Ёвон  қисмати   марказии  мамлакатро  бо  вилояти  Хатлон  мепайвандад. Дар  натиҷа   зарурати  аз  қаламрави  Ӯзбекистони  ҳамсоя  гузаштани  қатораҳои роҳи  оҳан  аз  байн  меравад.  Айни  ҳол   барои ба  даст  овардани  маблағ  гуфтушунидҳо  давом  доранд.