КОНФРОНСИ БАЙНАЛХАЛЛҚӢ ДАР БУХАРЕСТ

Душанбе,  10  феврал. (АМИТ «Ховар», Наталя  Михайлова). —  Маъмурияти  назорати  риояи  қонунҳо  дар  бораи  маводи нашъадори  сафоратхонаи  ИМА  дар  Руминия  аз  8 то 10  феврал  дар  шаҳри  Бухарест бахшида ба   масъалаҳои   мубориза ба  муқобили  маводи  нашъадор  дар  мамлакатҳои Шарқи  Наздику  Миёна  ва  Осиёи  Марказӣ  конфронси  минтақавӣ  баргузор  сохт. Аз  Тоҷикистон  дар  конфронси  мазкур   сардори  раёсати  зудамали  Агентии   назорати  маводи  нашъадори  назди  Президенти  ҷумҳурӣ,  полковник  Тӯра  Комилов  иштирок  дошт. Мухбири  АМИТ «Ховар»  ёдовар  мешавад, ки  Тоҷикистон  соли  2008  дар  маҷлиси   дар  шаҳри Истамбул  баргузоргардидаи  конфронси  мазкур   узви  доимии  он  пазируфта  шуд. Ҳадафи  асосии  конфронс  мубодилаи  маълумот  ва тавсиаи  ҳамкорӣ  дар  бобати  амалӣ  сохтани тадбирҳои  мубориза  ба  муқобили  хариду  фурӯши  ғайриқонунии  маводи  нашъадор  мебошад.  Конфронси  мазкур   айни  ҳол  бештар  аз  90  давлатро  муттаҳид  месозад.