МУНОСИБАТҲОИ НАВИ ҲАМКОРИҲОИ ТОҶИКИСТОНУ БЕЛОРУС

Душанбе, 24 феврал. (АМИТ «Ховар», Лаззат Диловарзод).- Бино ба иттилои Маркази матбуоти Вазорати энергетика ва саноат, вазири соҳа Гул Шералӣ гурӯҳи намояндагони соҳибкорони Белоруссияро бо сардории ҷонишини вазири саноати он Геннадий Свидерски ба ҳузур пазируфт. Дар ин вохӯрӣ ҳамкориҳои ҳарду ҷониб дар соҳаи энергетика ва саноат мавриди гуфтугӯ қарор ёфт. Дар ин дидор  ҳамчунин масъалаи воридоти техникаи дар конҳо ва хоҷагии кишоварзӣ истифодашаванда  ва ташкили як корхонаи муштараки васлкунии мошинҳои истеҳсоли Белоруссия дар Тоҷикистон     муҳокима  гардид. Дар навбати худ аз Ҷумҳурии Тоҷикистон ба Белоруссия фиристонидани маҳсулоти саноатӣ ва   кишоврзӣ аз масъалаҳои умдатарине буд, ки соҳибкорони  Белоруссия онро тақозо намуданд. Вохӯрӣ дар фазои дӯстона ва ҳусни тафоҳум миёни ҳарду ҷониб арзёбӣ шуд.