НАТИҶАҲОИ ПЕШАКИИ ИНТИХОБОТИ ПРЕЗИДЕНТИ УКРАИНА

Киев,  8 феврал. (АМИТ «Ховар»). —  Аз  рӯи  хабарҳои  охирини  Комиссияи  марказии  интихоботи  Украина,  то  соати  6 – у 30  дақиқаи  субҳи  имрӯз  77,43  фоизи протоколҳои овоздиҳии қитъаю  ҳавзаҳои  интихоботии   Украина  таҳлил  ва  ҷамъбаст  карда  шуданд. Аз рӯи  натиҷаи  ҳисоби овозҳо  Виктор  Янукович  пешсаф  мебошад, вале  фарқияти  натиҷаҳои  ба даст  овардаи  ӯ  нисбат ба  Юлия  Тимошенко   торафт  камтар  мешавад. Тибқи  хабарҳои расида,  48,92   фоизи  интихобкунандагон  ба  тарафдории роҳбари Ҳизби  минтақаҳои  Украина  Виктор Янукович  овоз додаанд. Сарвазири  Украина   ба 45,42  фоизи   овози  интихобкунандагон  соҳиб  гардидааст. 4,49  фоизи  интихобкунандагон  ба  муқобили  ҳар  ду  номзад  овоз  доданд.  1,16  фоизи  варақаҳои овоздиҳӣ беэътибор  дониста шуд. Дар  даври  дуюми  интихобот ғалаба  насиби  номзаде  хоҳад  гашт, ки  ба  аксарияти  овозҳои  интихобкунандагон  соҳиб  мегардад.