НОЗИРОНИ ЧИНӢ БА ТОҶИКИСТОН МЕОЯНД

Душанбе,  23  феврал. (АМИТ «Ховар», Наргис  Бояхмедова). – Бо  даъвати  Комиссияи  марказии  интихобот  ва раъйпурсии  ҷумҳурӣ  гурӯҳи  нозирони   Ҷумҳурии  Мардумии  Чин  барои назорати  ҷараёни  интихоботи   вакилони  Маҷлиси  намояндагони  Маҷлиси олии ҷумҳурӣ  ба  Душанбе  меоянд. Ба  гурӯҳи  нозирон   сафири  супоришоти  махсус Чжоу  Сяопей  роҳбарӣ  мекунад. Мухбири  АМИТ «Ховар»  хабар  медиҳад, ки  28  феврали соли  2010  дар   бинои Сафоратхонаи  Тоҷикистон  дар   Пекин қитъаи  интихоботӣ  кушода  мешавад. Ҳамаи  шаҳрвандони  Тоҷикистон, ки  рӯзи  интихобот   дар Пекин  мусофират  доранд,  метавонанд аз ҳуқуқи  конститутсионии  худ  истифода  бурда,  ба  тарафдории  номзадҳои арзандаашон  овоз  диҳанд. Айни  ҳол   дар  Сафоратхонаи  Тоҷикистон  дар  Пекин  рӯйхати  пешакии  интихобкунандагон  тартиб дода  мешавад. Аз  сафоратхонаи  Тоҷикистон   дар  Пекин  ба  АМИТ «Ховар»  хабар  доданд, ки  ҳамаи  масъалаҳои ташкилии  тайёрӣ ба  интихобот  ҳал  карда шудаанд.