ОҒОЗИ БОЗИҲОИ ЗИМИСТОНАИ ОЛИМПӢ

Душанбе,  15  феврал. (АМИТ «Ховар»). —   13  феврал  дар  шаҳри  Ванкувери   Канада  маросими  ботантанаи  ифтитоҳи  Бозиҳои  21 — уми  зимистонаи  олимпӣ  баргузор  гардид. Дар  маросими  ифтитоҳи он  генерал —  губернатори  Канада  ва  намояндаи  расмии  маликаи  Британияи  Кабир  Елизаветаи  дуюм  иштирок  намуданд. Бозиҳои олимпӣ  17  рӯз  давом  мекунанд,  Дар  ин  муддат  аз рӯи  15  намуди  варзиш  86   даста   мукофот  дода  хоҳад  шуд. Хабар дода  мешавад, ки бозиҳои  имсолаи  зимистонаи  олимпӣ  бо  фоҷиа  оғоз  ёфтанд.  Чанд  соат  пеш  аз  оғози бозиҳо  варзишгари  чанарони  гурҷӣ  Нодар  Кумариташвили  дар  вақти  машқ  ҳалок  гардид. Кумариташвили дар  маҳалли  машқи  Уистлер, ки  махсус  барои  бозиҳо  сохта шуда буд,   дар  гардиши  охирин  аз  ӯҳдаи  идораи  чана  баромада  натавонист ва  чанаи  он  чаппа  шуд.  Суръати  ҳаракати  чана   дар  роҳи  мазкур   дар  як  соат  140  километр  буд. Дар  натиҷа  варзишгар  ба  девораи  роҳ  бархӯрда  аз  ҳуш рафт.  Духтурон  баъди расонидани  кӯмаки аввалини  тиббӣ ӯро  бо  чархбол ба  шифохона  фиристоданд.  Варзишгар   баъди  ба шифохона оварданаш  вафот  кард. Як рӯз  пеш   дар  ҳамин  ҷо  варзишгари  чанарони  Руминия  Виолета  Страматурару низ   аз ӯҳдаи  идораи  чана  баромада  натавонист ва ба   девораи  роҳи  чанаронӣ  бархӯрда,  чанд  муддат  аз  ҳуш  рафт. Раиси  Федератсияи  байналмилалии  варзиши  чанаронӣ  чунин  мешуморад, ки  роҳи  чанаронии Уистлер  нодуруст  сохта  шудааст.  Тибқи  қоидаҳои  маъмулӣ  бояд  суръати  ҳаракати  чана   дар роҳ  набояд  аз 137  километр  дар  як  соат  зиёд  бошад. Вале дар  амал суръати  ҳаракати  чана  дар роҳи  мазкур  20  километр  дар  як  соат   зиёд  аст,  гуфт  вай.