ОТАШБОЗИИ КӮДАК САБАБИ МАРГИ Ӯ ШУД

Душанбе, 8 феврал. (АМИТ «Ховар», Жасмин Назарова). — Ҳафтаи сипаришуда дар миқёси ҷумҳурӣ 16 ҳодисаи сӯхтор бо хисороти молии умумии 63 ҳазору 695 сомонӣ ба қайд гирифта шуд. Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ Толиб Ҳаётов, масоҳати умумии сӯхторҳо 884 метри мураббаъро ташкил медиҳад. Чун ҳарвақта сабабҳои асосии ҳодисаҳои нохуш – муносибати беэҳтиётона бо оташ, вайрон кардани қоидаҳои бехатарӣ аз сўхтор ҳангоми истифодаи асбобҳои гармидиҳандаи барқӣ ва газӣ, расиши кӯтоҳи ноқилҳои барқӣ мебошанд. Дар давоми ҳафта дар вилояти Суғд – 6, вилояти Хатлон – 5, шаҳри Душанбе – 3, ноҳияҳои Ҳисор ва Рӯдакӣ -1 ҳодисаи сӯхтор ба қайд гирифта шудааст. Чунин ҳодисаи сӯхтор 2 феврали соли ҷорӣ дар манзили истиқоматии Раҷаб Раҷабов сокини маҳалаи Ҳоҷиало, деҳоти Чоркӯҳи шаҳри Исфара рух дод. Сабаби ба амал омадани сӯхтор оташбозии кўдакон мебошад. Кӯдакони хонаи мазкур захираи коҳи хушки дохили бордони автомашинаи тамғаи «Камаз», ки дар ҳолати корношоям қарор дошт оташ заданд. Ҳангоми сӯхтор дар масоҳати 11 метри мураббаъ захираи коҳ дар ҳаҷми 1500 кг ва «Камаз» пурра сӯхта нобуд гардид, инчунин Раҳматҷонзодаи Муҳаммадолимхони 4 сола бо 70 фоиз сӯхтани бадан ҷароҳат гирифта, ба ҳалокат мерасад. Зарари аз сӯхтори ба амал омада маблағи 2 ҳазор сомониро дарбар мегирад.