РАИСИ КУМИТАИ ИҶРОИЯИ ИДМ БА ДУШАНБЕ МЕОЯД

Душанбе,  25  феврал. (АМИТ «Ховар»,  Наргис  Бояхмедова). —  Раиси  Кумитаи  иҷроияи  ИДМ  Сергей  Лебедев пагоҳ, 26  феврал ба  Душанбе  меояд. Тавре  хабар  дода шуда буд, С.Лебедев  ба  ҳайати  нозирони мамлакатҳои ИДМ  дар назорати  ҷараёни  интихоботи  парлумони  мамлакат ва  гузаронидани  мулоқотҳо  бо  намояндагони расмии  Ҷумҳурии  Тоҷикистон  роҳбарӣ  хоҳад  кард. Мухбири  АМИТ  «Ховар» ёдовар  мешавад, ки бо  даъвати  Ҷумҳурии  Тоҷикистон  ҳайати  нозирони  ИДМ  аз  5  феврал  сар  карда, ҷараёни  тайёрӣ ва   гузаронидани  интихоботи  Маҷлиси  намояндагонро  назорат  мекунад. Ба  ҳайати  мазкур   аз  Озарбойҷон,  Арманистон,  Белорусия,  Қазоқистон, Қирғизистон,  Русия,  Ӯзбекистон, Ассамблеяи  байнипарлумонии   давлатҳои  ИДМ, Маҷлиси  парлумонии Иттифоқи  Русия  ва  Белорусия,  инчунин  Кумитаи  иҷроияи  ИДМ  150  нафар  шомиланд. Инчунин  11  нафар  намояндаи  Созмони   ҳамкории  Шанхай  ва 6  нафар намояндаи   Ҷумҳурии  Мардумии  Чин  барои назорати  ҷараёни  интихобот  ба  Тоҷикистон  омаданд.