ШУМОРАИ КОРГАРОНИ РОҒУН БА 13 000 РАСОНИДА МЕШАВАД

Душанбе, 3 феврал. (АМИТ «Ховар», Лаззат Диловарзод).-  Баъди додани эълон оид ба таъмини кор дар сохтмони НБО – и  «Роғун» шумораи хоҳишмандон хеле зиёд шуд. Имрӯз сохтмони ин иншооти бузург зери назорати давлат қарор дорад. Айни замон,  дар сохтмони ин нерӯгоҳ беш аз 6 ҳазор нафар коргарон ва мутахассисон бо ғайрати дучанд кору фаъолият доранд,- иброз доштанд дар Вазорати энергетика ва саноат ба мухбири АМИТ «Ховар». Бо бастани маҷрои об,    дар нақбу сарбанд ва қисматҳои дигари  сохтмон,  ҷои холии  кор якбора ду баробар зиёд хоҳад шуд. Аз рӯи ҳисоби пешакӣ то охири сохтмони иншоот барои 13 ҳазор нафар ҷои корӣ пайдо мешавад. Ин аст, ки барои сохтмон кадрҳои баландихтисос лозиманд, аз ин рӯ шӯъбаи  кадрҳои «Роғун ГЭС — строй»   онҳоеро, ки хоҳиши корро дар сохтмони мазкур доранд ва мутахассиси баландихтисос мебошанд,  бемамониат ба кор қабул менамояд.