ТАҒЙИРОТИ КАДРӢ ДАР ҲУКУМАТИ ТОҶИКИСТОН

Душанбе, 26 феврал. (АМИТ «Ховар», Бекназари Абӯбакр). — Имрӯз, 26 феврал таҳти раёсати Раиси Ҳукумати Ҷумҳурии Тоҷикистон, Президенти кишвар Эмомалӣ Раҳмон маҷлиси навбатии Ҳукумат баргузор гардид. Нахуст, масъалаи таъйин ва озод намудани кадрҳо ба мақомоти давлатӣ баррасӣ гардида, мутобиқи Қарорҳои Ҳукумати ҷумҳурӣ ва Амрҳои Президенти мамлакат Абдуғаффор Раҳмонов аз вазифаи муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон озод ва ба вазифаи муовини раиси вилояти Хатлон таъйин карда шуд. Хайрулло Маҳмадуллоев муовини вазири энергетика ва саноати Ҷумҳурии Тоҷикистон ва Наргис Бояхмедова муовини аввали директори Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон таъйин шуданд. Инчунин, Ҷӯраев Комил намояндаи тиҷоратии Тоҷикистон дар Олмон ва Муҳаммадӣ Тӯраев намояндаи тиҷоратии Тоҷикистон дар Эрон таъйин гардиданд.