ҚАТЪНОМАИ СММ ДАР БОРАИ 65 – СОЛАГИИ АНҶОМИ ҶАНГИ ДУЮМИ ҶАҲОН

Душанбе,  3 март. (АМИТ «Ховар»). —  Маҷмаи  кулли  СММ тибқи  пешниҳоди  Русия,  Озарбойҷон,  Арманистон,  Белорусия, Қазоқистон, Канада, Қирғизистон,  Молдавия, Тоҷикистон, Туркманистон, Ӯзбекистон, Украина ва  баъзе мамлакатҳои  дигар  дар  бораи  65 – солагии ба охир  расидани  Ҷанги  дуюми  ҷаҳон  қатънома  қабул  кард. Маҷмаи  кулли  СММ  ба  ҳамаи  давлатҳои  аъзо,  сохторҳо  ва  муассисаҳои  СММ,  созмонҳои  ғайриҳукуматӣ ва  хусусӣ   пешниҳод  кард,  ки  9  май  ҳамчун  рӯзи  поси  хотири   ҳамаи  қурбониёни  Ҷанги  дуюми  ҷаҳон  ҷашн  гирифта  шавад. Намояндаи  доимии  Федератсияи  Русия  дар  СММ Виталий  Чуркин  дар  бораи  қатъномаи  Маҷмаи  кулли  СММ   сухан  ронда,  изҳор  намуд, ки  дар  робита  ба   раиси  Маҷмаи   кулл  супориш  дода  мешавад, ки  моҳи  майи  соли  2010  бахшида ба  65 – солагии  анҷоми  Ҷанги  дуюми  ҷаҳон  маҷлиси  махсуси  ботантана  гузаронад.  Ба  қавли  В.Чуркин,  Русия  пешниҳод  менамояд, ки чунин  маҷлис  6  май  гузаронида  шавад.