АМАЛИЁТИ НАВИ ТЕРРОРИСТӢ

Adhd-drugs.net,  31 март. (АМИТ «Ховар»).  – Русия дар  давоми  як  ҳафтаи  охир  бори  дуюм ҳадафи  ҳуҷуми «бомбаҳои  зинда» қарор  мегирад.  Субҳи  имрӯз дар  шаҳри  Қизлари  Ҷумҳурии  Доғистон  дар  наздикии  биноҳои  Раёсати  корҳои  дохилӣ  ва  Хадамоти  федеролии  амният ду  таркиши шадид  ба  амал  омад. Аз  рӯи  маълумоти  пешакӣ,  дар  натиҷаи  ин таркишҳо  11  нафар,  аз  ҷумла  сардори Раёсати   корҳои дохилии  шаҳри  Қизлар  Виталий  Ведерников  ҳалок  шуданд. Хабар  дода  мешавад, ки   субҳи  имрӯз  дар  шаҳри  Қизлар  аввал  мошини   сабукрави  «Нива»  тарконда шуд. Баъди  дар  маҳалли  воқеа  ҷамъ   шудани теъдоди  зиёди одамон  шахси  либоси  милиса  дарбардошта дар байни  издиҳом  худро  тарконд.  Дафъаи  дуюм,  бар  асари таркиш  9  нафар  ҳалок  шуд. Вазири  корҳои  дохилии Русия  Рашид  Нургалиев  дастур  дод, ки  ин таркишҳо  ҳамаҷониба  таҳқиқ  намуда,  амнияти  корхонаю  муассисаҳои  дорои  аҳамияти  махсусан  муҳим  дар  Доғистон  пурзӯр  карда шавад.  Дар  ин  бора  инчунин  ба  Президенти  Русия  Д.Медведев  таъҷилан  хабар  дода шуд.