АМАЛИЁТИ СААД ТАҲТИ ВАСОЯТИ СММ ГУЗАРОНИДА МЕШАВАНД

Душанбе,  3 март. (АМИТ «Ховар»). —  Маҷмаи  кулли  СММ  2  март бо ташаббуси  давлатҳои  аъзои  Созмони  аҳдномаи  амнияти  дастаҷамъӣ — Русия, Арманистон,  Белорусия,  Қазоқистон, Қирғизистон,  Тоҷикистон ва  Ӯзбекистон  дар  бораи  зарурати  ривоҷ  додани  ҳамкории  ҳар  ду  созмон  ва  таҳти  васояти  СММ  гузаронидани  амалиёти  СААД  қатънома  қабул  намуд. Намояндаи  доимии  Русия  дар  СММ  Виталий  Чуркин ёдовар  шуд, ки  СААД   аз  соли  2004   дар  Маҷмаи  кулли  СММ  мақоми  мушоҳид  дорад.  Моҳи  январи  соли  2009   созишномаи  СААД  ва  СММ  дар  бораи  фаъолияти  муштараки   истиқрори  сулҳ   имзо  карда шуд.  Қатъномаи нав  барои   вусъат  бахшидани  ҳамкории  СААД  ва  СММ  имконияти  воқеӣ  фароҳам  меорад.  Минбаъд  Маҷмаи  кулли  СММ  аз  фаъолияти  Созмони   аҳдномаи  амнияти  дастаҷамъӣ  дар бобати  ривоҷ  додани   ҳамкории  минтақавӣ  дар  соҳаҳои  таҳкими  амният  ва  субот,  истиқрори  сулҳ,   мубориза ба  муқобили  терроризм,  маводи  нашъадор,  аслиҳа, ҷинояткории  муташаккилона,  хариду  фурӯши  одамон,  пешгирӣ  ва бартараф  сохтани оқибати  фалокатҳои  табиию  техногенӣ  ва  ғайра   истифода  хоҳад  кард.  Қатънома   гуфтушунид  ва  машваратҳои  муттасили   Муншии  умумии  СММ  ва  муншии  умумии  СААД – ро барои  мувофиқ  сохтани  нақшаҳои  фаъолияташон  пешбинӣ  мекунад.