БАРОИ ДУЗДИИ БОРҲОИ ТОҶИКИСТОН КӢ БОЯД ҶАВОБ ГӮЯД?

  Душанбе, 29 март (АМИТ «Ховар», Лаззат Диловарзод).- Бо чунин савол хабарнигори АМИТ «Ховар» ба сардори умури мусофиркашонии КВД «Роҳи оҳани Тоҷикистон» Андрей Тронин муроҷиат намуд. Вазъияти дар роҳи оҳан ва истгоҳҳои Ҷумҳурии Ӯзбекистон ба амал омадаро  дар Ҷумҳурии Ӯзбекистон шарҳ додан намехоҳанд,- иброз дошт Андрей Тронин. Бояд тазаккур дод, ки айни замон беш аз 700 қатора бо борҳои гуногун, ки аксарияти он барои сохтмони НОБ –и «Роғун» молу масолеҳи сохтмонӣ доранд,  бо ҳар баҳона дар ҳудуди Ӯзбекистон манъ карда шудаанд.  Рӯзҳои ахир аз тарафи роҳи оҳанчиёни Ӯзбекистон баҳонаҳое пеш оварда мешавад, ки гӯё қатораҳои Туркманистон садди роҳи гузаштани қатораҳои Тоҷикистон шуда бошанд. Қатораҳои Тоҷикистон дар тамоми роҳи оҳани Ӯзбекистон, аз ҷумла, Термиз, Қаршӣ ва истгоҳи Хавост нигоҳ дошта мешаванд ва барои нишон додани он, ки қатораҳо дар ҳаракатанд онҳоро аз як истгоҳ ба истгоҳи дигар кашонда мешаванд, яъне танҳо ҷояшон иваз мешавад, дар амал бошад қатораҳо беҳаракатанд,- мегӯяд А. Тронин.