М.КАБИРӢ НИШАСТИ МАТБУОТӢ БАРГУЗОР КАРД

Душанбе, 1 март. (АМИТ «Ховар», Акрам Ҳаитов). — Имрӯз раиси ҲНИТ Муҳиддин Кабирӣ дар бинои марказии ҳизб вобаста ба натиҷаҳои интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии намояндагони халқ, ки рӯзи 28 феврал дар саросари ҷумҳурӣ баргузор шуда буд, барои намояндагони васоити ахбори оммаи ватаниву хориҷӣ нишасти матбуотӣ барпо кард. Дар нишасти матбуотӣ дар баробари рӯзноманигорон, инчунин аъзои     Шӯрои сиёсии ҲНИТ ва ҷонибдорони ин ҳизб иштирок карданд. Дар рафти нишасти матбуотӣ М.Кабирӣ аз ҷумла изҳор кард, ки «дар ин интихобот назар ба интихоботи солҳои 2000 ва 2005 натиҷа ва пешравиҳои мусбат ба назар мерасиданд, аммо бо вуҷуди ин қонуншиканиҳо низ мушоҳида гардиданд». Ӯ ҳамчунин гуфт, ки «мо намехоҳем ба хотири интихобот ба чеҳра ва имиҷи миллату давлат халал ворид кунем, зеро мо наметавонем манфиатҳои давлатӣ ва миллатро болотар аз манфиатҳои ҳизбӣ ва гурӯҳӣ гузошта бошем». М.Кабирӣ аз номи Шурои сиёсии Ҳизби наҳзати исломии Тоҷикистон изҳор кард, ки онҳо аз ҳуқуқҳои худ бо роҳҳои қонунӣ муҳофизат хоҳанд кард. «Бо вуҷуди ин Ҳизби наҳзати исломии Тоҷикистон ҳанӯз ҳам умедвор аст, ки манофеи миллӣ ва давлатӣ, волоияти қонун, боло гирифта натиҷаҳои ниҳоии интихобот ба райъи хостаи мардум мутобиқат хоҳад кард. Ҳизби наҳзати исломии Тоҷикистон ба худ иҷозат медиҳад, ки бо роҳи муайян кардаи қонун барои ҳифзи райъи ҷонибдоронаш аз василаҳои мавҷуда истифода намоянд». Дар поёни нишасти матбуотӣ номбурда ба суолҳои хабарнигорон ҷавоб гуфта изҳор кард, ки ба тантанаи хирад бовар дорад.