МУЛОҚОТИ САРВАЗИР БО НАМОЯНДАГОНИ ШИРКАТИ ОЛМОНӢ

Душанбе, 4 март. (АМИТ «Ховар», Фарангис  Раҳимова). —  Сарвазири  ҷумҳурӣ  Оқил  Оқилов  имрӯз  бо гурӯҳи намояндагони  ширкати «Bosch» —   Ҷумҳурии  Федеролии Олмон таҳти роҳбарии  узви  раёсати он  Рудолф  Колм  ва намояндаи  ваколатдори  ширкати  мазкур   дар  Русия  ва  ИДМ  мулоқот  кард. Сарвазир  зикр  намуд, ки  Тоҷикистон   ба  ҳамкории  иқтисодӣ  бо  ин ширкати  калонтарини   Олмон омода  мебошад. Қайд  карда  шуд, ки барои   ба роҳ  мондани  ҳамкорӣ  корхонаҳои  муштарак  ташкил  карда шаванд. Р.Колм  ба  О.Оқилов   дар бораи  фаъолияти ширкат  маълумот  дода,  зикр  кард,  ки  корхонаҳои он  қисмҳои  эҳтиётии   мошинҳо,  таҷҳизоти  ташхискунанда,   асбобу  анҷоми  барқӣ,  техникаи  рӯзгор,  системаҳои таъмини   бехатарӣ  ва   дастгоҳҳои  саноатӣ  истеҳсол  менамоянд. О.Оқилов  пешниҳод  намуд, ки   меҳмонон  бо  ҷониби  Тоҷикистон   дар  бобати  сохтани   батареяҳои   офтобӣ,  бухориҳои барқии   гуногуншаклу  гуногунҳаҷм,  таҷҳизоти таъминкунандаи   бехатарии  кори   нерӯгоҳҳои барқӣ   ва  ғайра   ҳамкорӣ  карда  метавонанд. Намояндагони  ширкат  изҳор  карданд, ки  то  охири  сол  дар  Тоҷикистон   намояндагии  худро  кушода,  барои ташкили корхонаҳои  муштарак  талаботи  бозори  Тоҷикистон  ва  мамлакатҳои  дигари Осиёи  Марказиро  меомӯзанд.