ОҒОЗИ ДАЪВАТИ БАҲОРИИ ҶАВОНОН

Душанбе,  31 март. (АМИТ «Ховар», Фирдавс Таваров). —  1  апрел дар  саросари   ҷумҳурӣ  маъракаи  даъвати  баҳоронаи  ҷавонон  ба  хизмати  аскарӣ  оғоз  меёбад. Мувофиқи фармони Президенти Ҷумҳурии Тоҷикистон, Сарфармондеҳи  Қувваҳои  мусаллаҳи  мамлакат  аз  9  марти соли  2010 «Дар  бораи ҷавоб  додани  хизматчиёни  ҳарбии  мӯҳлати  хизматашон тамомшуда ва ба  хизмати  ҳарбӣ  даъват  кардани   шаҳрвандони  солҳои таваллудашон  1983 – 1992» маъракаи баҳоронаи  даъвати  ҷавонон  ба  сафи  Қувваҳои  мусаллаҳ  шурӯъ мегардад. Аз  Вазорати  мудофиа  ба  АМИТ «Ховар»  хабар  доданд, ки   имсол   масъулияти   иҷрои  нақшаи  даъвати  ҷавонон  ба  хизмати  аскарӣ  ва  таъмини  сифати  амалӣ  сохтани тадбирҳои  вобаста ба  ин  маърака  ба  зиммаи  муовинони  раисони  вилояту  шаҳрҳо  ва  ноҳияҳо  гузошта шудааст. Вазорати  мудофиаи  мамлакат  бо  мақсади  афзун  гардонидани ҳиссиёти  ватанпарастӣ  дар  байни  ҷавонон  ва  даъватшавандагон,  инчунин  вобаста ба  оғози даъвати  баҳорона  тадбирҳои гуногунро  ба  нақша  гирифтааст.