«САҲЕҲ»-ЭЪТИМОДНОКТАРИН САРЧАШМАИ ҲАДИСҲО

Душанбе, 12 март. (АМИТ «Ховар», Бекназари Абӯбакр). — Имрӯз дар шаҳри Душанбе бахшида ба 1200-солагии Имом ал-Бухорӣ ва аз ҷониби Созмони исломии илм, фарҳанг ва маориф  эълон гардидани шаҳри Душанбе ҳамчун пойтахти фарҳанги исломӣ дар соли 2010 конфронси илмӣ-ҷумҳуриявии «Имом ал-Бухорӣ ва илми ҳадис» баргузор гардид. Дар конфронс олимон, муҳаққиқон, намояндагони корпусҳои дипломатии хориҷӣ ва созмонҳои байналмилалии мустақар дар Душанбе иштирок ва маърӯза карданд. Президенти Академияи илмҳои Ҷумҳурии Тоҷикистон Мамадшо Илолов роҷеъ ба нақш ва ҷойгоҳи Имом ал-Бухорӣ дар фарҳангӣ исломӣ маърӯза карда, зикр намуд, ки бузургтарин кори ин фақеҳи Ислом он аст, ки ҳадисҳои саҳеҳро аз ҳадисҳои ғайри саҳеҳ ҷудо намуд, ки то имрӯз касе ба онҳо шакку шубҳа накардааст. Дар ҷаҳони Ислом китоби «Саҳеҳ»-и ал-Бухорӣ нақш ва мақоми хос дошта, баъд аз Қуръони Маҷид дар радифи саҳеҳтарин китобҳои исломӣ қарор дорад. Вазири фарҳанги Тоҷикистон Мирзошоҳрух Асрорӣ паёми дабири кулли Созмони исломии илм, фарҳанг ва маориф (ИСЕСКО) Абдулазиз ал-Твайҷирӣ ба иштирокдорони конфронсро қироат намуда, гуфт, ки бо талошҳои пайвастаи Ҳукумати мамлакат ва Сарвари давлат Эмомалӣ Раҳмон мақоми Тоҷикистон дар арсаи ҷаҳони Ислом сол то сол боло рафта, нуфузу эътибори хос пайдо менамояд. Аз ҷониби ИСЕСКО эълон гардидани шаҳри Душанбе ҳамчун пойтахти фарҳанги исломӣ дар соли 2010 ва баргузории Конфронси байналмилалӣ бахшида ба Соли бузургдошти Имоми Аъзам дар Ҷумҳурии Тоҷикистон, ки дар он зиёда аз 150 олимону муҳаққиқон аз 50 давлати ҷаҳон иштирок намуданд, гувоҳи ин гуфтаҳост. Иштирокдорони конфронс нақши ал-Бухориро бо осори безаволаш дар боло бурдани номи тоҷикон дар сатҳи ҷаҳонӣ муассир арзёбӣ намуда, «Саҳеҳ»-и ӯро аз сарчашмаҳои муфид ва эътимодноктарин унвон карданд.