ТАҶЛИЛИ НАВРӮЗ ДАР ДАНҒАРА

Ноҳияи  Данғара, 19 март.(АМИТ «Ховар», Бекназари Абӯбакр,  Дилшода  Ҷонмардова). —  Имрӯз  дар  варзишгоҳи  марказии  ноҳияи  Данғара ба  муносибати  таҷлили  иди  Наврӯз ҷамъомади ботантана  баргузор  гардид. Дар  таҷлили   ҷашн  Президенти  Тоҷикистон  Эмомалӣ  Раҳмон  ва  Президенти  Туркманистон  Қурбонгулӣ  Бердимуҳаммадов  иштирок  доранд. Президенти  Ҷумҳурии  Тоҷикистон  Эмомалӣ  Раҳмон  ҳамаи  ҳозирон ва  меҳмононро  ба  муносибати  иди  байналмилалии  Наврӯз  табрик  намуд. Вай  зикр  кард, ки  бо ташаббуси   Тоҷикистон  ва  бо  дастгирии   баъзе  мамлакатҳои  ҷаҳон  Маҷмаи  кулли  Созмони  Милали  Муттаҳид  чанд  рӯз  пеш  дар  бораи   таҷлили   Рӯзи  байналмилалии  Наврӯз  қатънома  қабул  кард.  Минбаъд иди  Наврӯз   дар  саросари  ҷаҳон  ҳамчун  иди   баҳор,  оғози  соли  нав,  эҳёи  табиат ва  оғози  кишту  кори  баҳорӣ  ҷашн  гирифта  мешавад. Ин,  бешубҳа  боиси  фараҳмандӣ  ва  сарфарозии  ҳамаи  сокинони  Тоҷикистон  мебошад. Дар  ҳақиқат   Наврӯзи  аҷамро   дар  давоми  ҳазорсолаҳо   халқҳо ва  миллатҳои  гуногуни  ҷаҳон – аз  қисмати  шимолии  Чин  сар  карда,  то   сарҳади  Аврупо,   аз  ҷумла  миллати бо  мо  дӯст  ва бародари  туркман   бошукӯҳ  ҷашн  мегиранд.  Ин  шаҳодат  медиҳад, ки   иди  Наврӯз  барои   равнақу  ривоҷи  фарҳанг  ва  муносибатҳои  дӯстонаи тамоми  инсоният  аҳамияти  калон  дорад,  гуфт  Сардори давлати  Тоҷикистон. Эмомалӣ  Раҳмон  зикр  намуд, ки  бо  фарорасии  Наврӯз   марди  деҳқон  ба  шудгор  кардани  замин   шурӯъ  намуда,  ниҳол  мешинонад,  дарахтони  мевадиҳанда  парвариш  намуда, ғалла  ва  пахта  корида,  барои  ба  даст  овардани  ризқу рӯзии  худ  ва  аҳли байташ  меҳнат  мекунад. Мухбирони  АМИТ «Хорвар»  ёдовар  мешаванд, ки  иди  Наврӯз  мувофиқи  анъана  ҳар  сол  дар  яке  аз  минтақаҳо, шаҳрҳо  ё  ноҳияҳои  мамлакат ҷашн  гирифта  мешавад.  Иди  Наврӯзи имсола  дар  ноҳияи  Данғара  баргузор  мегардад.