ТАЪМИНИ БОЭЪТИМОДИ ҚУВВАИ БАРҚ ДАР ВИЛОЯТИ СУҒД

Душанбе, 3 март. (АМИТ «Ховар», Жасмин Назарова). — Баъд аз баромадани Ҷумҳурии Ӯзбакистон  аз системаи ягонаи энергетикии Осиёи Миёна, аз моҳи январ инҷониб, системаи энергетикии Ҷумҳурии Тоҷикистон мустақилона бо реҷаи муайян фаъолият намуда истодааст. Тибқи маълумоти Вазорати энергетика ва саноати Ҷумҳурии Тоҷикистон, ба истифода додани хатти интиқоли барқи (ХИБ) 500 кВ «Ҷануб-Шимол» имконият дод, ки аз системаи энергетикии ҷануби кишвар, тавассути хати мазкур ба шимоли кишвар дар ҳар шабонарӯз ба ҳисоби миёна бо иқтидори то 190 МВт қувваи барқ интиқол дода шавад. Моҳи феврали соли равон аз ҳисоби нерӯгоҳҳои барқи обии ҷумҳурӣ бо иқтидори 314 МВт ва қувваи барқи воридотӣ аз  Ҷумҳурии Ӯзбакистон бо иқтидори 25МВт (ба ҳисоби миёна) ба қадри имкон соҳаҳои иқтисодиёт ва иҷтимоиёти вилояти Суғд бо қувваи барқ таъмин карда шуд. Умуман, моҳи феврали соли ҷорӣ дар асоси маълумоти фаврӣ фурӯши қувваи барқ дар вилояти Суғд  175.6 млн. кВт.соатро ташкил медиҳад. Бояд тазаккур дод, ки ягона нерӯгоҳи барқи обии амалкунанда дар вилояти Суғд НБО-и «Қайроққум» мебошад. Дар асоси дуруст ба роҳ мондани корҳои омодагӣ аз ҷониби роҳбарияти муассисаи мазкур ба мавсими тирамоҳу зимистони солҳои 2009-2010 иқтидори истеҳсолии нерӯгоҳ дар як шабонарӯз то ба 125 МВт расонида шуд.  Айни замон, бо мақсади таъмини боэътимоди қувваи барқ дар  вилоят аз ҳисоби маблағҳои ШСХК «Барқи Тоҷик» ва институтҳои байналмилалии молиявӣ, сохтмони хатҳои интиқоли барқ ва зеристгоҳҳо ба роҳ монда шудааст.