ЗАРДОЛУЗОРИ ТОҶИКӢ ДАР ПЕКИН

Пекин,  15 март. (АМИТ «Ховар», Наталя  Михайлова). —  14  март  дар  Боғи набототи  пойтахти  Ҷумҳурии  мардумии  Чин —  шаҳри  Пекин  таҳти  унвони «Дӯстӣ»  боғи  зардолузори  Тоҷикистон  бунёд  карда  шуд.  Дар  маросими  бунёди он  сафири  Тоҷикистон  дар  Чин  Рашид  Олимов  иштирок дошт. Вай  зикр намуд, ки боғ барои тоҷикон  нишонаи  фарҳангу  анъана,   расму оини  аҷдодӣ   ва   манбаи   таъмини  зиндагӣ  мебошад.  Тоҷикон   дар рӯзи таваллуди  фарзанди навашон  ҳатман   ниҳоли   дарахти  мевадорро  мешинонад.  Ҳар  тоҷик ба  меҳмони  худ   меваи  дарахтони  боғашро  пешниҳод  карда,  сазовори  иззату  икроми  мусофирони  аҷнабӣ  мегардад. Тасодуфӣ  нест, ки  Президенти  Ҷумҳурии  Тоҷикистон  Эмомалӣ  Раҳмон  ба  масъалаи   бунёди  боғҳои  нав  аҳамияти  калон  медиҳад. Дар  маросими  бунёди зардолузори тоҷикӣ  инчунин  муовини  директори  Боғи  набототи  Пекин  Чжао  Шивей, муовини  котиби   кумитаи  ҳизбии  Донишгоҳи  зироати  Пекин бону Гао Дун  ва  мушовири Вазорати  корҳои  хориҷии  Чин  Су  Фанцю  сухан  карданд. Дар  маросими бунёди  зардолузор   сафирон  ва  намояндагони  дипломатии  Озарбойҷон,  мамлакатҳои  Осиёи  Марказӣ, Вазорати корҳои  хориҷии  Чин ва  ташкилоту  идораҳои  шаҳри  Пекин  ширкат  варзиданд. Сафири  Тоҷикистон  дар  Чин  Р.Олимов  ба  ҳамаи   меҳмонон  миннатдорӣ  баён  намуд.