ҒОЛИБИ ОЗМУН СОҲИБИ ХОНАИ 80 000 $ ГАРДИД

Душанбе, 20 апрел.(АМИТ «Ховар», Марзия Саидова).-Коллективи меҳнатии мактаби таҳсилоти миёнаи умумии №94 –и ноҳияи Синои пойтахт ғолиби озмуни «Мактаби сол-2009» гардида, соҳиби як хонаи сеҳуҷрадор, воқеъ дар кӯчаи Сино, 42 гардид. Раиси шаҳри Душанбе Маҳмадсаид Убайдуллоев дар маросими тантанавӣ калиди хонаро, ки арзишаш 80 ҳазор доллари амрикоӣ аст,  ба директори мактаби мазкур супорид. Инчунин, дар Рӯзи пойтахт озмунҳои касбии «Мактаби сол-2009», «Кӯдакистони сол -2009», «Директории сол-2009», «Мудири кӯдакистони сол-2009», «Муаллими сол-2009», «Мураббии сол-2009» ва «Синфи беҳтарини сол -2009» ҷамъбаст гардида, ба ғолибон тӯҳфаҳои пулию молӣ тақдим карда шуд. Ҳамчунин, Раиси шаҳр ба хатмкунандагон –баррандагони медалҳои тилло  ва нуқраи литсей ва гимназияҳои пойтахт мукофотпулӣ тақдим кард. Инчунин, ба аълохонҳои мактабҳои таҳсилоти умумии шаҳр ва  донишҷӯёни аълохони Донишгоҳи давлатии омӯзгории Тоҷикистон ба номи устод С. Айнӣ идрорпулӣ  супорида шуд.