АВҶИ КОРҲОИ БАҲОРӢ ДАР НОҲИЯИ РӮДАКӢ

Шаҳраки Сомониён,19 апрел.(АМИТ «Ховар»,Ҳотам Рабиев).-Имсол ба мактабҳои ноҳия зиёда 700 нафар  муаллимон ба кор омаданд. Ин имкон дод, ки мушкилоти нарасидани омӯзгорон дар таълимгоҳҳои ноҳия пурра ҳал гардад,-иброз дошт раиси ноҳияи Рӯдакӣ Мансур Қодиров зимни нишасти матбуотӣ, ки имрӯз дар мақомоти иҷроияи ҳокимияти давлатии ин ҷо баргузор гардид. Дар нишасти матбуотӣ муовинони раис, мудирони шӯъбаҳо, раисони ҷамоатҳо, роҳбарони ташкилоту муассисаҳо ҳузур доштанд. Тавре, ки қайд гардид, идҳои баҳорӣ дар ноҳияи Рӯдакӣ имсол низ бо шукӯҳу шаҳомати хоса баргузор гардид. Беш аз 250 нафар писарбачаҳо хатнатӯй карда шуданд. Тӯйи арӯсию домодии 74 ҷуфт навҷавонон низ баргузор гардид.Албатта, дар ин кори хайру савоб ҳиссаи соҳибкорони ҳимматбаланд, имомхатибони масҷидҳо ва дигар шахсони саховатманд хеле бузург аст. Ба 1-уми апрели соли ҷорӣ дар ҳамаи сохторҳои хоҷагидорӣ дар майдони 8 ҳазору 445 гектар кишти зироатҳои баҳорӣ гузаронида шудааст, ки ин 5 ҳазору 804 гектар ғаллагиҳо, 472 гектар картошка, 601 гектар сабзавот, 1 ҳазору 71 гектар зироатҳои техникӣ ва 3 ҳазору 91 гектар хӯроки чорво мебошад.Дар ин муддат дар масоҳати 92 гектар боғи нав, 14 гектар токзори нав ва 26 гектар боғу, 11 гектар токзор барқарор карда шудааст.Хабарнигорон зимни нишасти матбуотӣ аз раиси ноҳияи Рӯдакӣ Мансур Қодиров ва дигар масъулин ба суолҳои сершумори худ ҷавобҳои мушаххас гирифтанд.