ДАР СЕ МОҲ ЯК ТОННА МАВОДИ НАШЪАДОР МУСОДИРА ШУД

Душанбе,  14 апрел. (АМИТ «Ховар», Наталя  Михайлова). —  Аз  дафтари  матбуоти  Агентии назорати  маводи  нашъадори  назди  Президенти  ҷумҳурӣ  ба  АМИТ «Ховар»  хабар  доданд, ки  натиҷаҳои  фаъолияти  он  дар  семоҳаи  аввали  соли равон  ҷамъбаст  карда шуд.  Дар  ин  муддат   кормандони  агентӣ 64  кӯшиши   хариду  фурӯши  ғайриқонунии  маводи  нашъадорро  барбод  дода,  вобаста ба  ҷиноятҳои   марбут  ба  хариду  фурӯши  маводи  нашъадор  50  парвандаи  ҷиноӣ  кушоданд. Аз  ин  ҷумла 38  парванда  нисбати 50 нафар  ба  судҳо  фиристода  шуд. Кормандони  агентӣ дар  давоми  се  моҳи  гузашта  198   килограмму 264  грамм  маводи  нашъадор,  аз ҷумла  21  килограмму  70  грамм  героин, 60  килограмму  116  грамм  афюни  хом  ва  117   килограмму  78  грамм   канабисро  мусодира  намуданд. Тӯли  моҳҳои  гузашта  ба  қатъ  намудани  фаъолияти  қочоқчиёни  маводи  нашъадор,  барҳам  додани   нуқтаҳо  ва шабакаҳои   фурӯши  маводи  нашъадор,  пурзӯр  намудани   мубориза ба  муқобили  қочоқи  нашъа  ва  қонунӣ  гардонидани  маблағи  фурӯши  маводи  нашъадор  диққати  асосӣ  дода  шуд. Хабар дода шуд, ки  аз  аввали  сол  дар  ҷумҳурӣ як  тоннаю 274 килограмму  907  грамм   маводи нашъадор  мусодира  гардид. Аз  ҷумла  кормандони  ВКД  715  килограмму  525  грамм,  Кумитаи  давлатии  амнияти  миллӣ 5  килограмму  678  грамм,  Хадамоти  гумрук  35  килограмму  775  грамм  ва  Раёсати  умумии артиши  марзбон  319  килограмму  665  грамм  маводи  нашъадорро  мусодира  карданд.