ДАР СУҒД 61 КОРХОНА АЗ ФАЪОЛИЯТ БОЗМОНД

Душанбе, 22 апрел. (АМИТ «Ховар», Бекназари Абӯбакр). – Дар давоми се моҳи аввали соли ҷорӣ 61 корхона ё  25,2 фоиз корхонаи саноатӣ дар вилояти Суғд аз фаъолият бозмондааст. Аз маркази иттилоот ва таҳлили дастгоҳи раиси вилояти Суғд ба АМИТ «Ховар» иттилоъ доданд, ки аз 243 корхонаи саноатӣ 131 корхона ё ки 53,9 фоиз афзоишро нисбати ҳамин давраи соли гузашта таъмин намуда, 51 корхона ё ки 20,9 фоиз нисбати ҳамин давраи соли гузашта ҳаҷми истеҳсоли маҳсулотро кам намудаанд. Аз 18 шаҳру ноҳияҳои вилоят танҳо ноҳияҳои Айнӣ, Мастчоҳ ва Кӯҳистони Мастчоҳ нисбати ҳамин давраи соли сипаригашта афзоиши маҳсулоти саноатиро таъмин карда натавонистанд. Аз 75 номгӯи маҳсулоти асосии истеҳсолшавандаи саноатӣ, дар соли ҷорӣ истеҳсоли 35 номгӯйи маҳсулоти саноатӣ нисбати ҳамин давраи соли гузашта зиёд гашта, ҳаҷми истеҳсоли маҳсулоти соҳаи саноати сабук 49,3 млн. сомониро ташкил дод, ки суръати афзоиш нисбати ҳамин давраи соли гузашта 113,5 фоизро дарбар гирифт. Мавриди зикр аст, ки суръати афзоиши маҳсулоти саноатӣ дар вилояти Суғд нисбати семоҳаи аввали соли 2009-ум 129,1 фоизро ташкил намуда, ба маблағи 69,9 млн. сомонӣ зиёд маҳсулоти саноатӣ истеҳсол гардид, ки ҳаҷми истеҳсоли маҳсулот бо нархҳои муқоисавӣ ба 310,4 млн. сомонӣ баробар шуд.