ГУМРУКЧИЁН КОМПЮТЕР МЕОМӮЗАНД

Душанбе, 28 апрел. (АМИТ «Ховар», Жасмин Назарова). – Тавре аз маркази матбуоти Хадамоти гумруки назди Ҳукумати Ҷумҳурии Тоҷикистон иттилоъ доданд, мақомоти гумрук бо мақсади баланд бардоштани самаранокии фаъолияти гумрукӣ дар доираи Консепсияи гумрук ва рушди инфраструктура «Системаи ягонаи автоматикунонидашудани иттилоотӣ» чораҳои заруриро амалӣ менамоянд. Бо мақсади амалӣ намудани лоиҳа, ки дар асоси созишнома миёни Ҷумхурии Тоҷикистон ва Бонки Осиёгии Рушд татбиқ шудааст, оид ба такмили тахассуси кормандони мақомоти гумрук барои фаъолият дар шароити нав бо истифодабарии технологияҳои иттилоотӣ дар давоми се моҳ омӯзиши асосҳои дониши компютерии кормандон ба роҳ монда шудааст. Бино ба гуфти омӯзгор Сайфулло Ҳикматов, барномаи мазкур аз ду марҳила иборат буда, омӯзиши он то охири соли ҷорӣ давом дорад. Он зиёда аз ҳазор нафар кормандони гумрукро дарбар мегирад. Айни замон дар марҳилаи аввал 540 нафар кормандони гумрук савияи тахассуси касбии худро дар ин ҷода такмил доданд. Бояд қайд намуд, ки ба ин машғулиятҳо кормандони воҳидҳои сохтории Дастгоҳи марказӣ ва раёсатҳои минтақавии мақомоти гумрук даъват карда шуда, ба онҳо устодони ботаҷриба ва олимони соҳаи компютерии мактабҳои олии ҷумҳурӣ дарс мегӯянд.