ИФТИТОҲИ РОҲИ ҲАВОӢ ТОҶИКИСТОНУ ПОКИСТОНРО НАЗДИКТАР МЕСОЗАД

Душанбе, 1 апрел.(АМИТ «Ховар», Марзия Саидова).-Дар шаҳри Душанбе Созишнома оид ба кушодани роҳи ҳавоӣ байни Ҷумҳурии Тоҷикистон ва Ҷумҳурии Исломии Покистон ба имзо расид. Созишномаи мазкур ба ширкатҳои ҳавонавардии ҳар ду давлат имконият медиҳад, ки парвозҳои дуҷонибаро ба роҳ монанд. Дар сурати ҳар чӣ зудтар оғоз намудани парвозҳо миёни Ҷумҳурии Тоҷикистон ва Ҷумҳурии Исломии Покистон ҳамкориҳои мутақобилан судманди ҳар ду кишвар дар бахшҳои иқтисоду тиҷорат тақвият меёбад. Аз ин рӯ, соли 2010 боз як соли дастовардҳо барои ҳарду давлат хоҳад буд. Аз Сафорати Ҷумҳурии Исломии Покистон дар Ҷумҳурии Тоҷикистон ба АМИТ «Ховар» иттилоъ доданд, ки тӯли солҳои охир муносибатҳои гуногунсоҳа байни ҳар ду давлат густариш меёбанд. Танҳо дар соли 2009 байни Тоҷикистону Покистон савдои мутақобила чор маротиба афзуд. Дар баробари  сафари расмии  Президенти Ҷумҳурии Исломии Покистон Осиф Алӣ Зардорӣ  ба Ҷумҳурии Тоҷикистон дар тавсеаи муносибатҳои ҳасанаи ҳар ду кишвар саҳифаи нав боз гардид.