КӮМАКИ ШИРКАТИ ДАВЛАТИИ СУҒУРТА БА ЗАРАРДИДАГОН

Душанбе, 21 апрел. (АМИТ «Ховар», Лаззат Диловарзод).- Моҳи апрели соли ҷорӣ боронҳои сел ва пай дар пай ба аҳолии ҳамаи ноҳияҳои   минтақаи Кӯлоб хисороти зиёд овард. Боронҳои сели рӯзҳои 17 ва 18 – уми апрели соли ҷорӣ боз аз нав дарёи Сурхобро ба тӯғён овард ва дар натиҷаи баланд шудани сатҳи об 57 хоҷагӣ дар деҳаи Гулистони ноҳияи Восеъ зарар дид, 253  сар гову моли мардум ба коми дарё рафт, беш аз 1 ҳазор гектар замини кишт зери обу лой монд, 2 сокини ноҳияи Шурообод ва як сокини ноҳияи Ҳамадонӣ ба ҳалокат расиданд. Ба гуфти сардори ширкати суғуртаи давлатии минтақаи Кӯлоб Саидумар  Сайфуллоев, 30 фоизи хонаҳои истиқоматии 5 ноҳияи ин минтақа қисман ва ё пурра хароб гардиданд. Ширкати суғурта ба 409 хонавода, ки қаблан бо шикати мазкур шартнома доштанд, маблаги шартномаро пурра пардохт хоҳад кард. Баъд аз аниқ шудани зарари хисорот ба ҳамаи оилаҳои зарардида баробар кӯмак расонида мешавад,- гуфт раиси ноҳияи Восеъ Султон Валиев телефонӣ ба мухбири АМИТ «Ховар».