МАЪРӮЗАИ МАХСУСИ СААД ДАР БОРАИ ҚИРҒИЗИСТОН

Душанбе,  9 апрел. (АМИТ «Ховар»). —  Котиботи  Созмони  аҳдномаи  амнияти  дастаҷамъӣ  вазъияти  Ҷумҳурии  Қирғизистонро  муттасил  таҳти назорат  қарор  додааст. Дар  изҳороти  созмон   гуфта  мешавад, ки  бетартибиҳо   дар  шаҳрҳои гуногуни  Қирғизистон  се  рӯз  боз  давом  доранд. Дар  ҷараёни онҳо теъдоди  зиёди одамон  куштаю  маҷрӯҳ  гардиданд. Дар  мамлакат  8  апрел Ҳукумати  муваққатӣ  ташкил   карда  шуд.  Ҳамчунин фаъолияти  парлумони  ҷумҳурӣ қатъ  карда  шудааст. Ҳукумати  муваққатӣ  тамоми  вазифаю  ваколатҳои Президент  ва  Ҳукумати  пештараи  мамлакатро   ба  зиммаи  худ  гирифтааст. Котиби  матбуоти  созмон Виталий  Струговетс  зикр намуд, ки муовини  Муншии  умумии  СААД  Валерий  Семериков  барои омӯхтани  вазъият  фавран  ба  Бишкек  рафт. Вай  баъди  шиносоӣ  бо  вазъияти  Қирғизистон  барои Шӯрои  амнияти  дастаҷамъии  созмон  маърӯза  пешниҳод  менамояд.