МАСЛИҲАТҲОИ СУДМАНДИ РАВОНИВУ ҲУҚУКӢ БА ЗАНОНУ ДУХТАРОН

Душанбе,  12 апрел. (АМИТ «Ховар», Ибодат Давлатова).-   Кумитаи кор бо занон ва оилаи назди Ҳукумати Ҷумҳурии Тоҷикистон бо дастгирии ЮНИФЕМ  ва мақомоти иҷроияи маҳаллии ҳокимияти давлатӣ  дар шаҳру ноҳияҳои ҷумҳурӣ марказҳои иттилоотӣ-ҳуқуқию  машваратӣ ва буҳронӣ таъсис додаанд, ки дар онҳо равоншиносону  ҳуқуқшиносон тариқи ройгон ба ниёзмандон маслиҳат медиҳанд, қайд намуданд дар нишасти матбуотии Кумитаи мазкур. Дар давраи ҳисоботӣ дар вилояти Суғд ба ин Марказҳо 610 нафар занон ва 220 нафар мардон оид ба масъалаҳои Кодекси замин, Кодекси шаҳрвандӣ ва хушунати оилавӣ муроҷиат намуданд. Чунин Марказҳо дар ноҳияҳои Рӯшони ВМКБ, Балҷувон ва Хуросони вилояти Хатлон, Нуробод ва Ҳисор низ таъсис дода шудаанд. Инчунин, дар назди Кумита Маркази «Боварӣ» фаъолият дорад ва равоншиносону ҳуқуқшиносони кумита дар 3 моҳи соли равон 509 нафар занону духтаронро ба масъалаҳои гуногун қабул намуда,  ба онҳо маслиҳатҳои судманди равониву  ҳуқукӣ  доданд.