МУЛОҚОТИ НАВБАТИИ ВАЗИРОНИ МОЛИЯИ ДАВЛАТҲОИ ИДМ

Душанбе,  1  апрел. (АМИТ «Ховар», Покиза  Маҳмадбекова). —  Имрӯз дар шаҳри  Маскав   машварати  навбатии  чоруми  вазирони  молия, иқтисод  ва  роҳбарони  Бонкҳои  марказии  мамлакатҳои  ИДМ  кушода шуд.  Дар он  масъалаҳои  марбут ба  вазъи  имрӯзаи  иқтисодиёти  мамлакатҳои  аъзои   Иттиҳод, иҷрои нақшаи  тадбирҳои  муштараки  бартараф  сохтани  оқибати бӯҳрони  ҷаҳонии  молиявӣ  ва  ғайра  муҳокима  карда  мешаванд. Дар  мулоқот  вазири  молияи  Ҷумҳурии  Тоҷикистон  Сафаралӣ  Наҷмиддинов  иштирок  дорад. Мувофиқи  маълумоти  Кумитаи  омори ИДМ,  моҳи  январи  соли  равон  пешрафти  иқтисодии  қариб ҳамаи мамлакатҳои  ИДМ  нисбат ба  соли  2009  бештар  мебошад.  Аз  ҷумла,  афзоиши  Маҷмӯи  маҳсулоти   умумии  дохилӣ  дар  Озарбойҷон 9,2 фоиз, Арманистон 2,4  фоиз,  Белорусия 1,3 фоиз  ва  Тоҷикистон  4,2  фоизро ташкил  дод. Истеҳсоли  маҳсулоти  саноат  дар  ИДМ  8  фоиз  афзуд.