НАФАҚАХӮРОНИ НОРОЗӢ

Душанбе, 20 апрел. (АМИТ «Ховар», Лаззат Диловарзод).- Тибқи маълумоти оморӣ,  дар шаҳри Душанбе 43 ҳазору 919 нафар нафақагирон зиндагонӣ мекунанд. Аз онҳо 22 ҳазорашон аз рӯи синну сол ва 6 ҳазору 745 нафарашонро ашхоси аз 75 сола боло ташкил медиҳанд. Ба ҳамаи ин   45 нафар кормандони Раёсати ҳифзи иҷтимоии шаҳр хизмат мерасонад. Дар  шӯъбаи ёрии ҳифзи иҷтимоӣ бошад 95 нафар ба ҳамаи нафақагирони барҷомонда ва ба дастгирӣ эҳтиёҷманд кӯмак мерасонанд, ки ин хеле кам аст. Агар инро бо   арифметикаи  оддӣ ҳисоб кардан мумкин бошад, ба 1ҳазор нафар нафақагир 1 нафар корманди ёрии ҳифзи иҷтимоӣ  рост меояд, ки ин нокифоя аст. Оё мумкин аст, ки 1 корманди шӯъбаи ёрии ҳифзи иҷтимоӣ дар як рӯз ба хонаи 1000 нафар рафта,  ҳама корҳои бозорию пухту паз ва шустушӯяшро ба ҷо орад, албатта не. Пас роҳи ҳалли онро чӣ гунна пешбинӣ бояд кард, вақте ки дар соли 2020 шумораи нафақагирон ду баробар зиёд мешавад?