НАМОИШГОҲИ МОЛҲОИ ЭРОНӢ

Душанбе, 27 апрел. (АМИТ «Ховар», Бекназари Абӯбакр). — 26 апрел дар боғи фарҳангу фароғатии «Наврӯзгоҳ»-и шаҳри Хуҷанд Намоишгоҳи байналмилалии маҳсулоти корхонаҳои Ҷумҳурии Исломии Эрон ба кори худ оғоз намуд. Муовини аввали раиси шаҳри Хуҷанд Иброҳимҷон Иброҳимов дар маросими расмии кушодашавии намоишгоҳ гуфт, ки сиёсати хирадмандонаи Президенти Ҷумҳурии Тоҷикистон Эмомалӣ Раҳмон имкони хеле мусоид барои ҳамкорӣ ва робитаи кишвари мо бо мамлакатҳои хориҷӣ фароҳам овардааст, ки густариши чунин равобит дар Паёми Сарвари давлат ба Маҷлиси Олии Ҷумҳурии Тоҷикистон ба таври рӯшан ва возеҳ ифода ёфтааст. Қобили таваҷҷӯҳ аст, ки ҳамгироии кишвари мо, ба хосса дар муносибат бо Ҷумҳурии Исломии Эрон солҳои охир амиқан эҳсос мешавад. «Намоишгоҳи байналмилалии корхонаҳои Ҷумҳурии Исломии Эрон дар шаҳри Хуҷанд, ки имрӯз ба кори худ оғоз мекунад ва ширкатҳои ин кишвар молу маҳсулоташонро ба маърази тамошо ва ихтиёрдории хуҷандиён ва мардуми вилояти Суғд мегузоранд, нишони барҷастаи густариши ҳамкориҳои мо бо ин мамлакати ҳамҷавор ва мутараққии Шарқ аст», — тазаккур дод И. Иброҳимов. Дар ин Намоишгоҳи байналмилалӣ 25 корхонаву ширкатҳои Ҷумҳурии Исломии Эрон маводу колои худро, ки иборат аз маҳсулоти саноатӣ, масолеҳи сохтмонӣ, молҳои қаннодӣ, маводи озуқа ва ғайраҳо иборат аст, ба маърази тамошо ва баҳрабардорӣ гузоштаанд.