ОЛИМОН ЗОДРӮЗИ АЙНИРО ҚАЙД КАРДАНД

Душанбе, 16 апрел. (АМИТ «Ховар», Сангзода Муслиҳиддин). – Ҳар сол, 15-уми апрел, дар рўзи таваллуди Садриддин Айнӣ ҷаласае унвони “Cолонаи Айнӣ” барпо мешавад, ки аҳли илму адаб ва фарҳанг перомуни ҷанбаҳои мухталифи осори устод гузоришҳои илмӣ   матраҳ      мекунанд. Имсол низ ҷаласаи навбатии “Солонаи Айнӣ” бо ибтикори Раёсати Академияи илмҳои ҶТ, Институти забон ва адабиёти ба номи Рўдакӣ ва Кумитаи Айнӣ баргузор шуд, ки аҳли илму фарҳангро бори дигар ба осори безаволи устод Айнӣ мутаваҷҷӯҳ кард. Сессияро Президенти АИ ҶТ  М.Илолов ифтитоҳ кард ва сипас, устодон М.Имомов ва М.Абдуллоев, Б. Камолиддинов, А. Муҳаммадаминов, Ш. Раҳмонов дар мавзўъҳои “Инъикоси масъалаи тоҷикон дар рўзномаҳои узбекзабон”,”Таъсирпазирии Айнӣ аз насри классикӣ”,”Китоби пандомўзи устод” ва “Имлои забони тоҷикӣ аз назари устод Айнӣ” гузоришҳо доданд. Мавриди зикр аст, ки устод Айнӣ  бо хизматҳои  иҷтимоӣ, осори илмиву таърихӣ ва адабиаш, ки оламшумуланд, номи хешро ҷовидон дар таърихи ҳам миллати тоҷик ва ҳам адабиёти ҷаҳонӣ гузоштааст. Қаҳрамони халқи тоҷик- аллома Айнӣ умри худро нисори миллати тоҷик кардааст ва осоре, ки аз ў ба ёдгор мондааст, мероси ин миллат мебошад.