ПОСИ ХОТИРИ ОЛИМИ СОҲАИ МАТЕМАТИКА

Душанбе,  12 апрел. (АМИТ «Ховар», Людмила  Дубинина). —  Донишҷӯёну  омӯзгорони  Донишгоҳи  миллии  Тоҷикистон рӯзҳои  наздик  90 —  солагии  рӯзи  таваллуди   олими  барҷастаи   соҳаи  математика,  доктори нахустини  илмҳои  физикаю  математика,  профессор  ва  собиқ  декани  факултаи  механикаю  математика  Магалим  Субҳонқуловро  ботантана  ҷашн  мегиранд.  Магалим  Акрамович  Субҳонқулов  22  апрели  соли 1920  дар  деҳаи  Куручевои  ҶМСШ  Тотористон  таваллуд  шудааст.  Ӯ Донишкадаи  омӯзгории  Бухороро  хатм  карда,  ба  Донишгоҳи давлатии   Самарқанд  дохил   мешавад.  Солҳои таҳсил  дар  Самарқанд ихтиёрӣ  ба  ҷанг  рафта,  борҳо  маҷрӯҳ  шудааст. М.Субҳонқулов  баъди  хатми  Донишгоҳи давлатии  Самарқанд  ба Донишгоҳи  омӯзгории  шаҳри  Андиҷон  ба  кор  фиристода шуд. Соли  1954  дар озмун  ғалаба  карда,   ба  Донишгоҳи давлатии Тоҷикистон  ба  номи  В.И.Ленин  ба  кор омад.  Дар  Душанбе  мудири  кафедраи   назарияи  функсияҳо   ва  таҳлили  математикӣ таъин  гардид. М.Субҳонқулов   аввал   муовини   ректори  ДДТ  дар  масъалаҳои  илм буд. Соли  1963 дар  мавзӯи  «Теоремаи Тауберов ва   соҳаҳои  истифодаи он» рисолаи  докторӣ  ҳимоя  карда,   дар Пажӯҳишгоҳи  математикаи  ба  номи  В.А.Стеклови  Академияи  илмҳои  ИҶШС  соҳи  унвони  профессор  гардид. Олим   баъдан  дар  Тоҷикистон  дар   назарияи  тауберов теоремаи  нави  бақиядорро   кашф  намуд. Таҳқиқоти  ӯ  дар  омӯзиши  назарияи  спектралӣ  ва  назарияи  шумора  истифода  карда  мешаванд.  М.Субҳонқулов  дар  Донишгоҳи  давлатии  Тоҷикистон   мактаби  математикҳоро ташкил  дод. Инчунин  таҳти роҳбарии  ӯ  дар  донишгоҳ  семинарҳо  ва  маҳфилҳои  математикӣ  ташкил  карда  мешуданд.  Шогирдони  М.Субҳонқулов  имрӯз  чӣ  дар  Тоҷикистон  ва  чӣ  дар  мамлакатҳои дигар  ба  таҳкиқоти  илмӣ ва  фаъолияти  омӯзгорӣ  машғуланд. Аз  ҷумла Г.Бобоев, Ф.Ан ва В.Стетсенко  дар  Русия, Б. Мойшезон ва Э.Самандаров дар   ИМА, И.Собитов  дар Донишгоҳи давлатии  Маскав  ба  номи  Ломоносов,  С.Мухторов   дар  Самарқанд,  В.Тошбоев  дар  Тошканд,  М.Исроилова  дар  Исроил,  В.Толбоев  ва А.Ғаффоров  дар  Хуҷанд  кор  мекунанд. Олим  барои  фаъолияти  илмию  омӯзгориаш  бо  мукофотҳои гуногуни  давлатӣ,  аз  ҷумла  медали «Барои  меҳнати шуҷоатнок»,  нишони «Аълочии  мактаби  олии ИҶШС»,  се  маротиба  бо  нишони  «Аълочии  маорифи  халқи  ҶШС  Тоҷикистон» ва  ифтихорномаҳои  Вазорати  маорифи  ҶШС Тоҷикистон  мукофотонида шудааст.