САБАДИ ЛОИҲАҲОИ ТОҶИКИСТОН ЧАНД АСТ?

Душанбе, 27 апрел. (АМИТ «Ховар», Бекназари Абӯбакр). — Ба ҳолати 1 апрели соли ҷорӣ татбиқи 55 лоиҳаи сармоягузории Ҳукумати Ҷумҳурии Тоҷикистон амалӣ шуда, маблағи умумии онҳо 1 миллиарду 829 миллион доллари ИМА, ё зиёда аз 8 миллиард сомониро ташкил медиҳад. Дар ин бора 27 апрел, зимни нишасти матбуотӣ раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Давлаталӣ Саидов маълумот дод. Вай зикр намуд, ки сабади лоиҳаҳои мазкур зиёда аз 16 соҳаи гуногуни иқтисодиётро дар бар гирифта, дар таркиби он маблағҳои қарзӣ — 75,3 фоиз, маблағҳои грантӣ — 14,2 фоиз, ҳиссаи Ҳукумати ҷумҳурӣ — 7 фоиз ва ҳиссаи ҷамоаҳо – 3,5 фоизро ташкил медиҳад. Дар доираи лоиҳаҳои сармоягузорӣ азхудкунии маблағҳо 24,74 миллион доллари ИМА-ро ташкил медиҳад. Аз ҷумла, дар соҳаҳои маориф – 1,4 миллион, тандурустӣ — 0,9 миллион, кишоварзӣ — 0,92 миллион, ирригатсия ва хоҷагии об- 2,44 миллион, обтаъминкунӣ — 0,72 миллион, энергетика – 4,31 миллион, нақлиёт ва хоҷагии роҳ – 10,72 миллион, экология ва ҳолатҳои фавқулодда – 1,39 миллион, газтаъминкунӣ — 0,7 миллион, инфраструктураи маҳаллӣ — 0,16 миллион ва дигар соҳаҳо 0,83 миллион доллари ИМА азхуд карда шудааст. Мавриди зикр аст, ки дар давраи ҳисоботӣ лоиҳаҳои созишномаҳои оид ба ҳавасмандгардонӣ ва ҳифзи мутақобилаи сармоягузориҳо бо давлатҳои Италия, Сербия, Уммон, Маҷористон, Австрия ва Афғонистон омода гардидаанд, ки айни ҳол дар сатҳи мувофиқа қарор доранд.